مبارك_ أهلا، إنت مين؟
النيابة _ محمود حسن مبروك، وكيل نيابة شرق
مبارك _ كويس كويس، فــ سنة كام يا محمود؟
النيابة _ بقول لحضرتك أنا وكيل نيابة
وجاي أحقق معاك في التهم المنسوبة ليك
مبارك _ ااااه، كل سنة وانت طيب
إزيك، عامل إيه
النيابة _ أنا كويس الحمد لله يافندم
مبارك_ ها .. نفسك تطلع إيه لما تكبر
ها .. طيار، كويس كويس، أنا كنت زيك كده وانا صغير، كان نفسي أطلع طيار، واحارب واضرب الضربة الجوية واعبر الكنال وبعدها أشتغل سفير في لندن، أصلي بحب لندن أوي، دي بلد الإكسلانسات، وانا كان نفسي حد يقولي يا إكسلانس، بس القدر اختارني لمهمة تقيلة على قلبي، وبقيت رئيس جمهورية زي ما انت شايف، وأتذكر ساعتها لما واحد زميلك سألني عن الضربة المليارية القادمة رديت عليه رد قاطع وقلتله الكفن ملهش جيوب، ومن ساعتها والجملة دي بتتدرس في معاهد وجامعات أوروربا، أومال إيه؟! ده اللي قايلها حكيم حكماء الشرق الأوسط والعالم
هاهاهاهاها
الشاي يا علاء
ها .. وعايز إيه بقى يابو حنفي؟
النيابة _ بقول لحضرتك جاي احقق معاك
مبارك _ أها .. إنت صحفي
طب ماتقول كده من الصبح يا أخي، ها، جاي من طرف أسامة ولا ممتاز؟، إوعى تكون جاي من طرف محمد علي إبراهيم، أنا سامع إنه بيعمل حركات مش تمام، وبيحب يلعب عريس وعريس مع الموظفين بتوعه، خلي بالك منه هاهاهاهاهاها
النيابة _ لأ يافندم مش صحفي
وكيل نيابة .. عظيم بيمين وكيل نيابة
مبارك _ خلاص ياعم عرفنا، ماتبقاش حمقي أوي كده
وعايز إيه بقى ياعم الوكيل؟
النيابة _ يالهوي ياما
جاي احقق معاك في التهم المنسوبة ليك
مبارك _ شوف إحنا كشعب مصري، أجمل حاجة فينا هي الإشاعات، دي ميزة على فكرة مش عيب
يعني مثلا إشاعة وفاتي اللي طلعها الجدع بتاع الدستور ده
الدستور الجرنان، مش الدستور اللي انا بعدله كل سنة مرة
هاهاهاهاها
أنا كنت بقول إيه؟
النيابة _ إشاعة وفاتك
مبارك _ أها، أهي الإشاعة دي بقى أجمل حاجة حصلتلي في حياتي هاهاهاهاهاها، ده كنت طاير من الفرحة ساعتها، علشان فكرتني بالموت، أومال، أنا بحب أفتكر الموت أوي
طب تصدق بإيه؟، قول لا إله إلا الله
النيابة _ لا إله إلا الله
مبارك_ أنا من ساعتها وانا مابفوتش فرض في الجامع، والصوم ده بقى ماقلكش، اتنين وخميس وربنا يتقبل وسبق وقلتلك قبل كده الكفن ملهش جيوب
النيابة _ ربنا يقوي إيمانك
وما أقوالك في التهم المنسوبة إليك؟
مبارك _ يابني ما انا قلتلك
تهم جميلة، أنا بحب الحاجات دي أوي، ربنا يزيد وبارك
الشاي يا علاء
النيابة _ يعني أنت معترف؟
_ طبعا .. أنا معدنيش حاجة أخبيها، واللي بقوله في الحمام هو اللي بقوله في البرلمان
وانا قلتلهم ساعتها ياخوانا نقعد مع بعض ونتكلم ونحل مشاكلنا في بيتنا بدال ما ننشرها زي الغسيل الوسخ كده واللي رايح واللي جاي يتفرج عليه، ولا إيه؟، خصوصا غن العالم كله متربص بينا، ومشروع الشرق الأوسط الجديد هيتنفذ هيتنفذ لا محالة
آدي النتيجة، لو كانوا سمعوا كلام حكيم حكماء الشرق الأوسط والعالم ماكنش حصل اللي حصل، لكن هقول إيه، واخدين دكتوراة في العند، اتفقوا على ألا يتفقوا، يلا ربنا يصلح الحال
النيابة _ هم مين دول؟
مبارك_ الأخوة الزعماء العرب
النيابة_ وإيه علاقة الأخوة الزعماء العرب باللي احنا فيه دلوقت؟!
مبارك_ الله !، مش انت بتاع ويكليكس؟!
النيابة _ مين؟
مبارك _ إنت .. جوليان أسانج، بتاع وكيليكس
الله! .. ياعم بتاع ويكليكس،
ويكليكس ياراجل، مش عارفه ولا إيه؟!، بتاع ويكليكس
النيابة _ عارفه والله، بس أنا مالي بأمه دلوقت
مبارك_ خلاص إنسى إنسى، ده انت بني ادم غريب .. كنا بنقول إيه
النيابة_ كنا بنقول إنك معترف
مبارك _ معترف بإيه؟
إنت هتقولني كلام وخلاص، أنا مش هتكلم غير في وجود المحامي بتاعي
النيابة _ ما هو متنيل موجود اهو
مبارك _ فين ده؟
النيابة _ اهو واقف جنب الدولاب اهو
مبارك_ أها
خد تعالى، إزيك؟، ها .. عامل إيه؟، والعيال عاملين إيه؟، ها .. ربيهم كويس وإوعى تدخل عليهم مليم حرام، الحرام أخرته خلعان، والكفن ملهش جيوب، واللي بيسرق بيروح شرم الشيخ زي ما انت شايف هاهاهاهاهاها
النيابة_ ممكن حضرتك تسيبك منه ونرجع للتحقيق تاني
مبارك_ أنا هتكلم معاك بصراحة، لأننا ونحن في تلك المرحلة الحاسمة من تاريخ أمتنا لابد من المصارحة، وانا بتاع المصارحة، تلاتين سنة مصارحة لما ورمت ولوزي اتفقعت، والعالم كله يشهد إني بحب اتصارح مع كل الأطراف
الشاي ياعلاء
النيابة_ لماذا أمرت بقتل المتظاهرين
مبارك_ شوف .. أنا مرة من المرات عندما كنت في بني سويف وكنت قائد اللواء وكنا نأخذ إجازة خميس وجمعة طوارئ دائما وكان هناك طاقم لازم يستمر في الوحدة أحد أفراد هذا الطاقم طلب أن يأخذ إجازة وحاول مع زملائه أن يبقي أحد مكانه لكن الجميع رفضوا فجاء إليّ وقلت له إنزل يا ابني وسأبقي أنا
هي دي روح الفريق الواحد والإيثار على النفس
النيابة _ لماذا قتلت بأمر المتظاهرين؟
مبارك _ إيه؟
النيابة _ أقصد لماذا أمرت بقتل المتظاهرين؟
مبارك _ إنت مالك يابني مش مجمع ليه؟
أجيبلك ليمون تهدي أعصابك .. حاسك متوتر
الشاي يا علاء
النيابة _ من فضلك جاوب على سؤالي
مبارك_ هجاوبك حاضر
بص يا سيدي
هناك حسابات قبل الحرب كانت تقول إننا في أول ضربة سوف نخسر من 25% الي 30% وأنا لا أتحمل أن أدفع ب 200 طائرة فيقع منها 50 فكان لابد من قرار حكيم يحل المشكلة دي، فالرئيس السادات كلفني ...
النيابة _ سادات مين وضربة مين ياعم الحج
إرحم أمي بقى
مبارك _ يابني طول بالك عليَّ، ماتاخدش الموضوع على صدرك كده، مش لازم أشرحلك أبعاد الموقف؟!
ده جيل إيه المهبب ده؟! كل شوية تقاطعني كده، مش معقول يااخي، وبعدين دي فرصة تاريخية، حاول تستفيد من خبراتي، وماتقاطعنيش
النيابة_ إتفضل حضرتك
مبارك _ منطقة الدفرسوار كانت نهاية عمل الجيش الثاني وبداية عمل الجيش الثالث فهي منطقة حدود بين الجيشين.. وطبعاً بعدما تقدمت القوات كان لابد من وجود هجوم مضاد.. وكانوا يدبرون لهجوم مضاد قبل ذلك فدخلوا من هذه الثغرة وعملوا الكوبري
ومن ساعتها وانا بحب الكباري أوي
_ ؟؟؟؟؟؟؟؟
!!!
مبارك _ مالك يابني؟
الشاي ياعلاء
وقد ورد الينا نص التحقيقات من الزميل احمد سعد المراسل الدائم لدي مكتب النائب العام متسوش تنشروا التحقيق
ليست هناك تعليقات:
إرسال تعليق